Ternechara Jeseňikostar palpale andre bertena
Duj Rakle, o Martin Jaš the Petr Blajze khatar o foros Jeseňikos, so len kamen amare šingune te lel kijo kris, bo kamenas te maren bišutrineberšengere Romes, hin akanakes andre bertena. Šingune daranas, bi šaj kerenas bibacht, te bi len na phandle andre. Informaciji pal oda anďa džuvľi khatar Thaneskro kris Jeseňikoste. Soduj džene imar jekhvar kris Jeseňikoste bičhaďa pro trin berš vaš oda, hoj jekhetanes mek jekhe avre rakleha ňilaje oka berš zorales marde Romes Romňaha. O bareder kris andro foros Olomouc, phenďa, hoj o kris na sas mišto the hoj kampel, kaj o kris Jeseňikoste mek jekhvar diňa goďi pal oda, so te kerel kole diline čhavenca. „Imar adaj hin dokumentacija, aľe mek pes oleha ňič na kerelas,“ phenďa kij’oda šeraľi pro kris Jeseňikoste e Jana Nesvadbová.
Sar phenen šingune, o Jaš th’o Blajze arakhle pre staňica jeseňikoste jekhe terne Romes. „Angleder pre leste ča vičinenas. Jekh le raklendar pre lende vičinelas „kale džvirina“ the paľis les vasteha marelas pal e muj the diňa leske čang andro per,“ phenďa kij’oda šinguňiko mujaľi Jeseňikoste e Natálie Orlová. Le Romes hin phagerdo nakh the pr’o agor les iľe andre špitaľa. „Dujto raklo pr’oda dikhelas the phenelas, hoj oda hin lačho,“ mek phenďa mujaľi. Bišujekhberšengero Jaš phagerďa the jekh berš phureder Blajze phagerde buter čačipna. Soduj terne rakle šaj chudena duj berš andre bertena.
|
redakční systém Saluki
