Bulletinos Zrcadlo-Gendalos na kerel organizacija Dženo
Organizacija Dženo kamel, kaj savore te džanen, hoj Dženo na diňa avri informacijakro bulletinos Zrcadlo – Gendalos, so les kerďa o Jakub Polák. Nevo informacijakro bulletinos, mol 20 koruni, no ňiko na džanel, savi organizacija les diňa avri the andre bulletinoskeri tiraža nane aňi aver informaciji, save odoj mušinen te avel sar phenen o čačipna. Organizacija Dženo šoha na diňa duma le Jakub Polakoha pal oda, hoj jekhetanes kerena ajso bulletinos. Organizacija Dženo arakhľa, hoj ajso bulletinos hin pal oda so o bulletinos imar sas andre distribucja. „Zrcadlo – Gendalos“ the čhoneskro ľil Amaro Gendalos nane jekh. Organizacija Dženo kerel peskro čhoneskro ľil Amaro Gendalos, savo tumen akanakes dikhen pro internetos.
„Som bachtalo, hoj anglo Roma the lengeri situacija vareko chudľa te kerel nevo ľil. Somas bachtalo, kana arakhľom, hoj aver džene kamen te del vast le Romenge, th’avka hoj pr’oda našťi zaroden ňisave love,“ phenďa o Ivan Veselý, šeralo khatar organizacija Dženo.
„Organizacija Dženo poťinela bare love, kaj le manušen te avel romano čhoneskro ľil. Akanakes amen rodas drom, sar te del informaciji pal o Roma modernone dromeha – pal o internetoskro radio Rota the internetoskro ľil. Mi del o Del bacht le Polakoske! Ča mange phares, hoj Polakoskero bulletinos dičhol maj avka, sar amaro ľil, the avka manuša paťan, hoj Zrcadlo – Gendalos the Amaro Gendalos hin jekh. Mek paše n‘ achaľuvav, soske o Polakos ajci kamel te del avri ľil Amaro Gendalos, sar phenel andre peskero bulletinos. O Jakub Polák kerelas buťi andre Amaro gendalos sar šerutno redaktoris dži agor palune beršeske. No, imar andal 1. 1. 2004 odi buťi na kerel the na kerel aňi ňisavi buťi andre organizacija Dženo,“ mek phenďa o Ivan Veselý, šeralo andre organizacija Dženo.
Kateřina Mahdalová
|
redakční systém Saluki
