Komentaris: Alosariben andro ERTF
Romale, kamav te reaginel pr'oda, so irindža o Romano voďi 11/2005 andre leskero ľil pal o Čechiko alosariben andro European Roma and Travellers Forum (ERTF). Irinde odoj nevipen tel o nav V ČR proběhly podivné volby do Evropského Fóra Romů a Travelerů. Dikhav, hoj o informacii na džan lačhe dromeha. Irinav pal kada, kaj te dav informacii čačutne.
Jekh informacia hin, hoj o Grémium romských regionálních představitelů (GRRP) has vikidlo, kaj te organizinel nacionalno alosariben andro ERTF. Aver informacia hin, hoj o Ondřej Giňa mek mangľa khatal o bordos le ERTFskero, kaj te prethoven alosariben pal jekh kurko.
GRRP thoďa jekh Výzva the bičhaďa upreder 300 e-maili! Savi has reakcija? Pre kaja Výzva pes prihlašinďa ča jekh. Gábina Hrabaňovo, so hin šeraľi la organizaciake Athinganoi. Aver prindžarde organizacii na kerde reakcia. Mušinav te phenel, hoj e Gábina Hrabaňovo pes thoďa, sar kampel pro zastupcas khatal romaňi organizacia. Mušinav lake te paľikerel vašoda, hoj amenge pomožinďa te predel informacii the organizačnones.
Aver informacia hin čačutuňi: Bičhaďam amari Výzva andre amare romane medii. Andro Romano hangos, Romano voďi, andre romaňa relaciakeri redakcia pro čechiko radios the andro romane organizacii, so keren nevipena palo internet – andre asociacia Dženo the andre asociacia Romea. Na dikhľom ňisavi informacia pal amari Výzva pro kala internetova seri.
Čačo hin, hoj o alosariben andro ERTF kerďam paťivaha andro mekbareder interesis, kaj te avel o Čechiko andre kaja struktura zapojimen.
Aver informacia hin, hoj calo organizačno buťi pal o alosariben andro ERTF, kerďam andre amaro časos, peskere lovenca, ňiko amen na diňa love pro organizačno buťi. Romale, džanen soske? Bo kamas te požinel le Romenge ando Čechiko. Na džanav, save interesi hin avre organizacien, aľe amen tumen vičinas kio bešiben the vakeriben.
Ladislav Bílý - o tajemňikos la organizaciake GRRP, foto: autoris
|
redakční systém Saluki
