|
|
|
Romanes
Historija: Khatar čačeste avle o Roma?
Andre amare ďivas imar lačhes džanas, hoj Roma avle andal e Indija. Hoj oda čačipen, oda sikhavel romaňi čhib. But andre romaňi čhib hin ajso sar andre varesave čhiba, save vakeren manuša andre Indija. Nane amen informaciji, kana o Roma mukhle Indija the imar šoha na džanaha, khatar kaj the soske o Roma gejle het. But džanle manuša paťal, hoj Roma Indija na mukhle jekhetanes the hoj imar andre Indija sas ulade andre buter fajti avka sar aver naciji andre Indija dži adaďives.
|
|
Romanes
Ternechara Jeseňikostar palpale andre bertena
Duj Rakle, o Martin Jaš the Petr Blajze khatar o foros Jeseňikos, so len kamen amare šingune te lel kijo kris, bo kamenas te maren bišutrineberšengere Romes, hin akanakes andre bertena. Šingune daranas, bi šaj kerenas bibacht, te bi len na phandle andre. Informaciji pal oda anďa džuvľi khatar Thaneskro kris Jeseňikoste. Soduj džene imar jekhvar kris Jeseňikoste bičhaďa pro trin berš vaš oda, hoj jekhetanes mek jekhe avre rakleha ňilaje oka berš zorales marde Romes Romňaha. O bareder kris andro foros Olomouc, phenďa, hoj o kris na sas mišto the hoj kampel, kaj o kris Jeseňikoste mek jekhvar diňa goďi pal oda, so te kerel kole diline čhavenca. „Imar adaj hin dokumentacija, aľe mek pes oleha ňič na kerelas,“ phenďa kij’oda šeraľi pro kris Jeseňikoste e Jana Nesvadbová.
|
|
Romanes
Maškarthemutňi romaňi unija (IRU) dela vast le Romenge pre Slovensko
Andre reakcija pr’oda so pes kerel pre Slovensko, kerel Maškarthemutňi romaňi unija (IRU) humanitarno sthoviben predal o Roma pre Slovensko. IRU kamel te bičhavel le Romenge pre Slovensko chaben the gada, kaj le Romen odoj te avel feder dživipen, andre lengeri phari situacija. Unijakro šeralo kamel, kaj savore te džanen, hoj IRU le manušendar, save kamen te del vast, na lela love. Chaben the gada šaj anen andro fora Brno, Karlovy Vary, Praha vaj Ostrava.
|
|
Romanes
Bulletinos Zrcadlo-Gendalos na kerel organizacija Dženo
Organizacija Dženo kamel, kaj savore te džanen, hoj Dženo na diňa avri informacijakro bulletinos Zrcadlo – Gendalos, so les kerďa o Jakub Polák. Nevo informacijakro bulletinos, mol 20 koruni, no ňiko na džanel, savi organizacija les diňa avri the andre bulletinoskeri tiraža nane aňi aver informaciji, save odoj mušinen te avel sar phenen o čačipna. Organizacija Dženo šoha na diňa duma le Jakub Polakoha pal oda, hoj jekhetanes kerena ajso bulletinos. Organizacija Dženo arakhľa, hoj ajso bulletinos hin pal oda so o bulletinos imar sas andre distribucja. „Zrcadlo – Gendalos“ the čhoneskro ľil Amaro Gendalos nane jekh. Organizacija Dženo kerel peskro čhoneskro ľil Amaro Gendalos, savo tumen akanakes dikhen pro internetos.
|
|
Romanes
O Gross kamel zoraleder kontroli pro hraňici paš e Slovensko
Šinguňiko miňistros, savo pal oda, so pes ačhiľa pre Slovensko, kerďa zoraleder kontroli pro hraňici paš e Slovensko, chudľa amare bičhadendar andro parlamentos mek bareder zor. Bičhade andro parlamentos thode angle, kaj majostar pro hraňici te aven bareder kontroli.
Ada ďives šaj sako le čechikone vaj slovaňikone ľilneca džal paš e hraňica sathanende, no imar pal o duj čhon šaj paš e hraňica džal ča pro 94 thana – 22 hraňična thana the 74 hraňična droma.
|
|
|
|
|
| |
AVER DŽENE DIKHEN
JEKHBUTER |
| |
|
|
redakční systém Saluki
